‘n Herinnering

Natuurlik herinner die woord “dissipel” ons aan die groepie mense rondom Jesus. En aan die verhale wat ons oor hulle het. Die groepie vissermanne op die strand. Iemand sit onder ‘n skaduboom en hou hulle dop. Hy kou aan ‘n grassprietjie. Hy knik sy kop, glimlag en staan op. Hy kom nader. “Hallo.” Hulle kyk op. “Kom saam met My…” Die stories ken ons verder baie goed. Hoe hulle soms onder mekaar geredekawel het oor wie nou eintlik die belangriste is. Sommige se name is meer bekend as ander. En wat hulle gedoen het ook. Johannes… ons weet mos iets van Johannes. En Petrus? Hom ken ons moontlik die beste.

Dissipel 13 wil ons herinner aan Jesus en die mense om Hom. Dit wil ons herinner aan die invloed wat Hy op hulle gehad het. En dit wil ons herinner aan Sy manier van doen.

En dit wil ons herinner daaraan dat die enigste mense wat regtig iets met Hom te doen gehad het, dissipels van Hom was.

‘n Stelling

Dissipel 13 maak daarom ‘n stelling. Stelling: Mense wat glo, is dissipels. Stelling: Glo handel nie oor hemel toe gaan nie. Stelling: Glo gaan oor lewe. Vandag. Stelling: As jy glo, is jy dissipel 13. Daarom is die sogenaamde tema ook ‘n stelling oor hierdie mense van hierdie gemeente. Stelling: Hier wil ons dissipels van Jesus wees. Punt.

‘n Vraag

Dissipel 13 is ook ‘n vraag. Is ek dissipel 13? Wil ek dissipel 13 wees? Dit is ‘n uitnooi-vraag: Kom… wees saam met my dissipel 13!

Verstaan jy wat ek bedoel as ek sê dit is baie meer as ‘n “tema”?

Dit sê iets oor my en jou. En oor ons. Wie ons is!

Mensig… ek is sommer opgewonde oor Dissipel 13!